Oduu
Ayyaanni Irreechaa waggaa 150n booda bifa
ho’aa ta’een Hora Finfinneetti yeroo jalqabaatiif bara kana kabajamerratti,
namoonni miiliyoona 7 ol ta’an hirmaataniiru.
Ayyaana Irreechaa
Finfinneefi Harsadii bara 2012 kabajame irratti qophiiwwan adda addaa ga’aan taasifamuu koreen qindeessituu kabaja
ayyaanichaa beeksise.
Irreechi Finfinnee
waggaa 150 oliif adda citee ture yeroo jalqabaatiif bara 2012 kabajamuun;
qabsoon ummata Oromoo sadarkaa sadarkaan deebi’aa jiraachuu mul’isa jedhameera.
Koreen kabaja ayyaana Irreecha
Finfinneefi Harsadee dursu Abbaa Gadaa Tuulamaa Goobanaa Hoolaafi Abbaa Gadaa
Maccaa Warqinaa Tarreessaati.
Abbaan Gadaa Goobanaa
walitti qabaa korichaa yoo ta’an, Abbaa Gadaa Warqinaan ammoo itti aanaa
walitti qabaadha.
Akka ibsa isaaniittis
iddoon malkaafi Abbaan Malkaa Hora Finfinnee qorannaa adeemsifameen adda
baafameera.
Gosti naannicha ture
Gullalleefi Galaani.
Isaanis magaalattii
keessaa dhiibamanii naannoo Oromiyaa kallattii adda addaafi biyyattiirratti
faca’anii jiraachaa jiru.
Ayyaanni Irreechaa Hora
Finfinnee Fulbaana 24, Irreechi Harsadee ammoo Fulbaana 25,2012 kabajamee ooleera.
Ayyaanicha sirnaan
keessummeessuuf koreen adda addaa ijaaramee socho’aa jira.
Koree walitti qabaa
kabaja ayyaana Irreechaa abbootii Gadaatiin durfamuun cinaatti, dhalattoonni
Finfinnees ijaaramanii tumsaa jiru.
Milkii isaatiifis
abbootii Gadaa, mootummaa naannoo Oromiyaa, Finfinneefi caasaa nageenyaa waliin
qindoominaan hojjetamaa jira.
Irreecha
Finfinneerratti namoonni miiliyoonni 7 akka hirmaatantu eegama.
Keessummoonni kanneenis
nyaata, dhugaatii, iddoo bultii akka hin rakkanne, karroota Finfinnee shananiinuu
qophii ga’aan taasifamee ayyaanni bifa
ho’aan kabajamee jira.
Kabaja ayyaanichaarrattis
tokkummaan Oromoofi aadaan hammattummaa sabootaaf qabu bal’inaan
calaqqisiifamee jira.
Fiigichi Irreechaa
Guddichi Hora Finfinnee Fulbaana 11 bara 2012 Magaalaa Finfinneetti
gaggeeffamee jira.
Sagantaa fiigichaa kana
Biiroon Aadaafi Tuurizimii Oromiyaa dhaabbata DCT Intarteeyimantii waliin
qindoominaan qopheessaniiru.
Fiigichi Irreechaa
Guddichi kabaja ayyaana Irreechaa Hora Finfinnee Fulbaana 24 bara 2012
ayyaaneffatamu sababeeffachuun kan qophaa’edha.
Akka itti aanaan
hogganaa biiroo Aadaafi Tuurizimii Oromiyaa obbo Admaasuu Waaqgaarii jedhanitti
fiigicha Irreechaa Guddicha kanarratti namoonni kumni 50 ol ta’an hirmaatanii
jiru.